لقاؤنا مع د. حسين يحيى 2007

الحوار ده عملناه مع د حسين السنة اللي فاتت 2006/2007 وده كان نصه ...

بسم الله الرحمن الرحيم

** استكمالا لما بدأناه العام الماضي من التعبير عن مشاكل الطلاب إلى السادة رؤساء الأقسام كان لنا هذا اللقاء الشيق أستاذنا الفاضل أ.د / حسين يحيى رئيس قسم الجراحة التحفظية ..

** بداية نحب نرحب بحضرتك ونشكرك على إتاحة الفرصة لينا عن التعبير عن مشاكل زملائنا والمتعلقة بقسم الجراحة التحفظية ..
** قبل أي حاجة نحب نعرف من حضرتك فيما إذا كانت هذه هي رغبتك في الالتحاق بكلية طب الأسنان وخاصة قسم الجراحة التحفظية ؟؟
- بصراحة انا ربنا هو اللي جابني هنا ... اما لما دخلت الكلية كانت فعلا دي رغبتي بالالتحاق بقسم العلاج التحفظي .
** أرجوا من حضرتك انك تسمح لي بالانتقال مباشرة إلى مشاكل الطلاب ..

*** بالنسبة لـلــ requirement : عددها كبير جدا وخصوصا بعد صعوبة الحصول على أسنان طبيعية من المستشفيات فأصبح الموضوع أكثر صعوبة ؟ وهل من الممكن استخدام أسنان اكريل بدل الطبيعية خصوصا في الـ crown ؟
- هو فعلا الحصول على أسنان طبيعية بقى صعب .. لكني بأصر على إنكم تشتغلم بأسنان طبيعية علشان تعود إيديك على الــ tactile sense بتاع السنة الحقيقية .. وعلى العموم أنا بقول لو أنت مطلوب منك مثلا 25 سنة وقدمت لي 15 مفيش مشكلة .. أنا اقبلهم ولكن مع وجود فارق خفيف درجة أو درجة ونصف مثلا علشان التمييز بين الطلاب ... أما مشكلة الأسنان البلاستيك إن الـ T.S بتاعها مختلف تماما عن الأسنان الطبيعية .. لكن اللي عايز يكمل شغله في الـ crown بأسنان بلاستيك يكمل مفيش مشكلة بس يحاول يستخدم أسنان طبيعية بقدر الإمكان .

** بالنسبة للأسنان اللي بيطلبها المعيدين منا .. أنا كطالب صعب جدا أدي للمعيد السنة بتاعتي خصوصا إني بحصل عليها بعد مجهود كبير ... دا غير الوقت اللي بيهدر من السكشن اثناء البحث عن سنة ؟
- لا خلاص يا أولاد .. أنا هنبه على المعيدين إنهم يدخلوا السكاشن بأسنان جاهزة بعد كده .

** وقت السكاشن غير كاف تماما ؟!!
- هي المشكلة دي زادت بعد أجازة يوم السبت .. وعلى العموم أنا هنبه في المعامل إن المعملين يفضلوا مفتوحين كل يوم لحد الساعة 5:30 بس مش عايز حد يسيب محاضرة ويجي يشتغل في المعمل .. كمان يوم الخميس أول ما المعامل تفضى الأمناء هيقفلوها .. لأني مش هزنبهم على الفاضي ..

** نرجوا من حضرتك أن المعيدين يصححوا الـ Requirement في غير أوقات السكاشن المخصصة للمادة ..!!
- مفيش مشكلة أنا هقول للمعيدين يصححوا أي فرع يطلب منهم تصحيحه .
** عدد الـ x-ray المطلوب كثير والجهاز بيعطل كثير وعدد الطلاب اللي عايزين يعملوا x-ray أيضا كثير ..!!
- خلاص سيب لي الموضوع ده إن شاء الله هنشوف له حل .

*** ننتقل مع حضرتك لمشاكل العيادة والمعمل ..
** عدد الوحدات غير كاف في المعمل والعيادة .. وأيضا بعض الوحدات فيها أعطال ؟!!
- المشكلة إن الميزانية محدودة جدا فهو ده اللي بيمنعنا من إحضار وحدات جديدة .. وعلى العموم في 13 ينت جاية جديد للعيادة إن شاء الله هيخفوا الضغط شويه على العيادة .. أما بالنسبة للمعامل فإحنا بنعدي كل شوية نشوف اللي وحدته عايزه تصليح .. واللي وحدته فيها مشاكل يجي وربنا يسهل ونعرف نصلحها له ..

** في شكوى من ضعف النور في المعامل .. دا غير إن نور الوحدات مش شغال أصلا .!!
- بصوا يا أولاد .. أنا عملت في موضوع النور ده اللي أقدر عليه.. إحنا صلحنا أنوار السقف وان شاء الله هنبه على الأمناء إن النور يفضل شغال في أوقات العمل .. أما نور الوحدات فالمشكلة إن زملائكم هم اللي افسدوا النور ده بالسبرتايات لكن الوحدة الأساسية سليمة فاللي عايز يركب لمبة من عنده هو حر لكن على العموم هنركب لكم الوحدات السليمة الومجودة بدل وحدات الليت اللي مش شغالة .

** عدد المعيدين غير كاف في العيادة والمعمل .. وخصوصا أثناء الشرح ..!!
- خلاص إن شاء الله هنزود العدد أثناء الشرح .. أما بالنسبة لعدم قدرة الطلاب على عدم سماع أو رؤية الشرح فأنا طلبت من إدارة الكلية توفير كاميرات ديجيتال بحيث يتمكن الطلاب من رؤية الشرح وربنا يسهل ونوفرها قريب ..

** إيه مشكلة كتب الترم الثاني ؟
- في ظروف أحالت دون طباعة الكتب .. لكن إن شاء الله السنه الجاية هتتوفر فانا عايزكم تنبهم على زملائكم إنهم يشوفوا الدكتور المحاضر بيقول لهم يذاكروا منين علشان يلحقوا يذاكروا ..

*** بالنسبة للامتحانات ..
** على أي أساس بيكون أسلوب الامتحان ؟
- واضع الامتحان هو اللي بيقرر أسلوب الامتحان ما إذا كان مقالي أو MCQ حسب ما هو عايز يختبر الطلاب في إيه .. وعلى العموم إن شاء الله وقت امتحان آخر السنة هيكون كاف للإجابة عن الأسئلة .

** هل من الممكن التنبيه على الامتحانات المفاجئة قبلها بأسبوع ؟
- بالنسبة لمادتي .. طالما الطلاب بيحضروا مش هيكون في امتحانات مفاجئة لحد آخر السنة .. وعلى العموم الامتحانات اللي عدت كانت عليها درجات قليلة .

** أحب انتقل مع حضرتك لمشكلة بتشغل بال كل الطلاب وهي مشكلة التقديرات .. تقديرات الكليات الأخرى مرتفعة جدا بالنسبة لكليتنا .. ودا ليه أثر عكسي على فرص عمل خريجي جامعة طنطا في المراكز المهمة بالداخل والخارج وأيضا التوزيع الجغرافي للطلاب بعد التخرج .. دا بالإضافة إلى إن مستوى طالب طنطا أفضل من باقي الكليات بشهادة الجميع ..!!
- هي فعلا مشكلة صعبة ... المشكلة إن الطالب مهما كتب فهو لا يستوفي الإجابة الكاملة فهو ده سبب انخفاض التقديرات عن باقي الكليات عندنا ... لكن إن شاء الله وعد السنه دي هنضع في الاعتبار تقديرات الكليات الأخرى .. وأنا بتكلم عن قسمي مش باقي الأقسام .. بس انتم شدوا حيلكم .. وربنا يوفقكم ..

* باسم طلاب كلية طب الأسنان بنشكر حضرتك على هذا اللقاء الممتع ..
- لا شكر على واجب .

prof dr hussein is the (king) of operative department>hope him all bests

بجد مشكورا جدا على المجهود دا بس ياريت ان الكلام دا يتنفذ بجد
اذا كان التقديرات او المعامل الى هتتفتح لغيت 5:30 او المعيدين الى هيدخلوا السكشن باسنان معاهم
يااااااااااااااااارب يتنفذ[b] :cheers: :cheers:[b]

دكتور حسين ده بجد قمة فى الاحترام والأخلاق
انا بجد بعتبره مثلى الأعلى
قليل اوى ما بنلاقى دكتور بالشكل ده

يارب يكون الكلام ده صحيح خصوصا موضوع التقديرات دي اللى الواحد
بيشد في شعره منها .. بيطلع عينينا وفي الاخر مقبول او جيد بالعافيه..[/b]