رد: كرسي الاعتراف

من طرف tifour 1/9/2008, 12:11 pm

خلاص اختار تولايتس

وعايزكم تقطعوها حتت حتت
و توروها النجوم ف عز الضهر

من طرف new teeth 1/9/2008, 1:11 pm

من طرف dr_mony_2010 1/9/2008, 1:40 pm

تولايتس

انا هايزه أكون أول واحدة أسالك ...
هما شوية صغننين

mmmmmmm

من معرفتى بيكى عارفة انك شقية جدا عايزه أعرف موقف وحش حصلك بسبب الشقاوة ؟

الصداقة بالنسبة لك ايه ؟؟ و عمرك اخدت مقلب فى حد قريب منك أوى ؟؟؟

عمرك ندمت على قرار اخدتيه ؟؟ و ايه هو ؟

mmmmmmm

كفاية كده لحد ما تردى و أكون فكرت فى شوية اسئلة ...........

من طرف amalgam 1/9/2008, 3:02 pm

انا كمان عندي سؤالات

حد خيب طنك قبل كده؟
يعني كنت متوقعة حاجة يعملها وخذلك؟

ندمتي على صداقتك لحد؟

ايه العيوب اللي في شخصيتك ونفسك تغيريها؟

مخلصتش لسه
دول ع الماشي كده
على ماافكر في اسئلة تانية

من طرف twolights 1/9/2008, 4:50 pm

تصدق يا تيفور
والله العضيم وحياه صيامى
انا كنت متاكده ان حضرتك هتقعدنى انا ع الكرسى
مقبوله منك يا لورد

من طرف twolights 1/9/2008, 4:59 pm

وحشانى يا مونى والله
من معرفتى بيكى عارفة انك شقية جدا عايزه أعرف موقف وحش حصلك بسبب الشقاوة ؟

هو بصراحه وانا ف ثانوى كان ف مسيو تامر بتاع الفرنساوى كان مستاصدنى انا وواصحابى من شقاوتنا
كان اول ما يدخل يقول يا انا يا الديسكين اللى ورا دول
فكنا بنطرد ومره مش رضينا نتطرد اخدنا استدعاء ولى امر

بلاش سياحه بقى واسئله محرجه كدا

الصداقة بالنسبة لك ايه ؟؟ و عمرك اخدت مقلب فى حد قريب منك أوى ؟؟؟

الصداقه دى احلى واهم حاجه ف حياتى بالنسبه ليا زى الاكسجن
وخصوصا انك عارفه يا مونى ان مش ليا اخوات بنات
فاصحابى واصدقائى هما اخواتى
والحمد لله مش اخدت مقلب لانى مش بقول اسرارى لاى حد

عمرك ندمت على قرار اخدتيه ؟؟ و ايه هو

ايوا يا ستى
ف يوم مكنتش عايزه اخرج وماما غصبت عليا
وللاسف خرجت واتسرقت بس الحمد لله قبضوا ع الحرامى واخدت طارى

هرد عليكى يا امالجم والله بس مش دلوقتى

من طرف tifour 1/9/2008, 6:04 pm

هسيبك للزمن يخلص تاري منك

ماهو اصل الزمن اقوى مني و منك

وروحي وانتي .................. يا تولايتس

من طرف الدياصتي 1/9/2008, 6:19 pm

انا عايز اسأل حضرتك؟؟

انتي شقيه فعلا و لا دي فنجرة بق؟؟ يعني تفاريح
اصل بيتهياقلي انك غلبانه مش بتاعت شقاوه
بمعنى اخر (اللي يشوفك يفتكرك فارس ف ساحته ....ما يعرفش انك حتى الشراب شاحته)

انتي بتحبي تطبخي ؟؟ و لا بتاكلي عالجاهز؟؟
ليه دخلتي اسنان؟؟ مجموع ولا نزاكه؟؟
حبيتي اسنان ولا اكتشفت ان عمرك ضاع و هيضيع؟؟؟؟؟
نفسك تشتغلي بعد التخرج ولا شهاده بس عشان تعلقيها ف التاكس؟؟؟؟؟
ايه سرك؟؟؟؟
بوحي لنا بواحد

مش عايزين تذاكي ف الاجابات

من طرف new teeth 1/9/2008, 11:07 pm

عيزة اسال يا تولايتس انتي شوفتيني قبل كدة؟؟؟؟
قولي موقوف ليكي وانتي صغيرة كل ما تفتكريه تضحكي؟؟
احلى موقف ليكي تحبي انه يتكرر؟؟؟؟
بتحبي تتعرفي على ناس كتير؟؟؟
هل هناك موقف خلاكي تفقدي الثقة بنفسك؟؟؟ما هو؟؟
هل هناك موقف خلاكي تثقي بنفسك؟؟؟؟

يلا جوبي

من طرف twolights 1/9/2008, 11:34 pm

حد خيب طنك قبل كده؟
يعني كنت متوقعة حاجة يعملها وخذلك؟

ايوا....فى حاجات بتكتشفيها ف الانسان بعد ما تقربى منه وتبقى مش متوقعاها خالص انها موجوده فيه
وطبعا بيحصل اللى مكنتش اتوقعه

ندمتي على صداقتك لحد؟

يس

ايه العيوب اللي في شخصيتك ونفسك تغيريها؟

انى حساسه اووى ودموعى قريبه جدا
يعنى لو حد جرحنى بكلمه او شخط فيا بس دموع بتزعل بسرعه ومش بعرف اتحكم فيها
ودى بيحسسنى انى ضعيفه مع انى مش كدا

ف انتظار المزيد يا امالجم بس بلاش احراج

من طرف twolights 1/9/2008, 11:37 pm

مش رايحه ف حته يا تيفور
انا اعده على قلبك

ههههههههههه

فين اسئلتك يا تيفور يعنى تسيبنى ع الكرسى وتمشى

من طرف twolights 1/9/2008, 11:50 pm

انتي شقيه فعلا و لا دي فنجرة بق؟؟ يعني تفاريح

انا مش فنجرت بحاجه الا لما مونى سالتنى لانى هى عارفانى
وبعدين مش شقيه مع اى حد اللى اعرفهم وبس

....ما يعرفش انك حتى الشراب شاحته)

يا دى الفضيحه
هههههههههههههه

انتي بتحبي تطبخي ؟؟ و لا بتاكلي عالجاهز؟؟

اكيد بحب اكل ع الجاهز .......اما حكايه الطبيخ دى فبحب اعمل اللى بحبه
يعنى مش بطبخ كل الاكل ...حاجات معينه

ليه دخلتي اسنان؟؟ مجموع ولا نزاكه؟؟

انا دخلتها حبا فيها...من تانيه ثانوى وانا نفسى اجيب مجموع يدخلنى اسنان
وكنت كاتبا اسنان طنطا رغبه اولى كمان والحمد لله جتلى

حبيتي اسنان ولا اكتشفت ان عمرك ضاع و هيضيع؟؟؟؟؟

ان شاء الله مش بيضيع ولا هيضيع

نفسك تشتغلي بعد التخرج ولا شهاده بس عشان تعلقيها ف التاكس؟؟؟؟؟

التاكسى عليه شهادات كتير مش ناقص زحمه
اكيد نفسى اشتغل واحقق احلامى واسافر برا واتعلم اكتر
لكن لو كان يهمنى شهاده وخلاص كنت ممكن اخد اى شهاده من معهد حتى واوفر على نفسى التعب ده كله.

ايه سرك؟؟؟؟

نوووووووو

مش عايزين تذاكي ف الاجابات

من طرف twolights 2/9/2008, 12:02 am

انتي شوفتيني قبل كدة؟؟؟؟

ممكن اه وممكن لا

قولي موقوف ليكي وانتي صغيرة كل ما تفتكريه تضحكي؟؟

وانا صغيره (بيبى يعنى )مكنتش بعيط ولا بتحرك
كانوا يجوا يحركونى او يزقونى عشان يتاكدوا انى عايشه....نادر اووووى لما كانوا يسمعوا صوتى
ومش بدات اتكلم الا عند سنتين كدا
دى اكتر حاجه بضحك عليها لانها نقيد معايا دلوقتى...سبحان الله

احلى موقف ليكي تحبي انه يتكرر؟؟؟؟

كل مواقفى مع اصحابى وقت التهيس والرحلات نفسى انها تستمر فور ايفر

بتحبي تتعرفي على ناس كتير؟؟؟

جدا جدا
بحب يبقى ليا اصحاب وعلاقات كتييييييير

هل هناك موقف خلاكي تفقدي الثقة بنفسك؟؟؟ما هو؟؟

ايام ثانويه عامه...كنت دايما ببقى حاسه انى مزاكرتى مش هتجيب المجموع اللى اتمناه

هل هناك موقف خلاكي تثقي بنفسك؟؟؟؟

بعد نتيجه الثانويه العامه ...دى اكتر حاجه وزدت ثقتى بنفسى
لكن المواقف كتير بتحصل وهتحصل ان شاء الله
اصل لو مش فى ثقه مش هعرف اتعامل او حتى افكر و ف نفس الوقت مش توصل لحد الغرور

يلا جوبي

لا ههههههههههههه

اظن مفيش اجابات احسن من كدا

من طرف twolights 2/9/2008, 12:05 am

طلعتوا عينى بجد
على فكره مده الاعتراف اسبوع بس مش هيزيد
انا كدا بقالى يومين وفاضل خمسه

من طرف amr_yadak 2/9/2008, 12:27 am

اسبوع كتير برده
خليهم 3 ايام على زمة التحقيق وخلاص

من طرف twolights 2/9/2008, 12:28 am

ملكش سؤال ف نفسك يا عمرو؟؟

من طرف dr_mony_2010 2/9/2008, 1:43 am

لا لا لا لا

الأستجواب يبقى لمدة أسبوع ....
دا مطلب جماهيري ....

انت صعبتى عليا خالص لأن العالم دى بهدلتك جامد ، حسألك أسئلة لايت خالص...

- ايه اكلتك المفضلة ؟؟
- لو اخترت بلد تزوريها ف العالم حتكون ايه ؟؟؟ و لو اخترت بلد تعيشى فيها ( مصر اجابة غير مسموحة ) ؟؟؟
- يعنى ايه يوم الأجازه المثالى بالنسبة لك ؟؟
- شايفه مين قدوتك ف الحياه ؟؟
- شايفه نفسك فين بكره ؟؟
- ساعات بنحس اننا عندنا احلام بس صخرة الواقع و الناس بيحطوها ... ايه هو حلمك اللى اتدمر و هو لسه ف خيالك ؟؟؟
- انت ف رأيك ان لسه فى الدنيا فى حب و رومانسية و لا خلاص نقرأ على روحهم الفاتحة ؟؟ (...... آمين )

ايديا تعبت بجد كفاية كده عليكى دلوقتى ...

من طرف twolights 2/9/2008, 2:07 am

- ايه اكلتك المفضلة ؟؟

البيتزا والشوكلت

لو اخترت بلد تزوريها ف العالم حتكون ايه ؟؟؟

باريس

و لو اخترت بلد تعيشى فيها ( مصر اجابة غير مسموحة ) ؟؟؟

ممكن اعيش ف بلد عربى زى السعوديه بس مش فور ايفر

يعنى ايه يوم الأجازه المثالى بالنسبة لك ؟؟

اعمل فيه حاجه تسعدنى اوووووى

- شايفه مين قدوتك ف الحياه ؟؟

انا بحب اخد من كل شخصيه اللى يعجبنى فيها يعنى مش حد معين قدوتى
انا قدوه نفسى

- شايفه نفسك فين بكره ؟؟

ف شبين الكوم هههههههههههه
العلم عند الله يا مونى

ساعات بنحس اننا عندنا احلام بس صخرة الواقع و الناس بيحطوها ... ايه هو حلمك اللى اتدمر و هو لسه ف خيالك ؟؟؟

لحد دلوقتى لسه مش ادمر.....بس لو ادمر هقولك

انت ف رأيك ان لسه فى الدنيا فى حب و رومانسية و لا خلاص نقرأ على روحهم الفاتحة ؟؟ (...... آمين )

اكيييييييييييييييييييد ان شاء الله ....وهنقرا الفاتحه ليهم مش عليهم

ايديا تعبت بجد كفاية كده عليكى دلوقتى ...

يمهل ولا يهمل

من طرف super_dentist 2/9/2008, 2:42 am

ايه ده
انت قمت يا تيفور
انا كان عندي كمان تلات اربع مجموعات ليك
نفدت من تحت ايدي

ماعلينا
مرحب بيكي يا تولايتس عالكرسي
عندي مجموعه اولى
ده انا ههريكو اسئله

ايه لونك المفضل ؟
ايه الموقف اللي حصلك قبل كده و مش عايزه تفتكريه ؟
ايه الهدف اللي حققتيه و كنتي سعيده جدا بيه ؟
و ايه الهدف اللي لسه ما حققتيهوش ؟
و ايه هدفك الاكبر في الحياه ؟
ايه اكتر موقف محرج اتعرضتيله ؟
مين اكتر شخص بتحبيه في حياتك ؟
ايه الحاجه اللي بتدوري عليها في حياتك ؟ ( الاجابه كلمه واحده بس )
لو هتوصفي نفسك في تلات كلمات بس هتقولي ايه ؟
تولايتس شخصيه صريحه ؟ و لا مجامله معظم الوقت ؟
تولايتس مع المثل اللي بيقول ( اصرف ما في الجيب ياتيك ما في الغيب ) و لا ( القرش الابيض ينفع في اليوم الاخضر )
ايه احتر نصيحه حد نصحهالك و فادتك ؟ و مين الشخص ده ؟
ايه اكتر مثل شعبي بتحبيه ؟
تولايتس والثقه في النفس ؟؟ و هل في اوقات بتكوني فيها مغروره ؟
برضو هكرر سؤالي لتيفور : لو لاقيتي الفانوس بتاع علاء الدين و طلعلك المارد و قلك تطلبي حاجه واحده بس هتكون ايه الحاجه دي ؟ و ليه ؟
تولايتس دينيا ؟؟
ايه الدعاء اللي بتحبيه جدا ؟ و لو في حد بيدعيهولك هو مين ؟

كفايه دول حاليا
في مجموعه تانيه لسه

ياريت ماحدش يقوم من عالكرسي غير لما نخلص الاسئله بتاعتنا
او كل اسبوع ضيف فكره كويسه

من طرف الدياصتي 2/9/2008, 4:10 am

وماله

خلصو اسئلتكم و هاتوه تاني

من طرف tifour 2/9/2008, 4:15 am

عزيزتي تولايتس

انا اسئلتي لسه ما حضرتهاش بس اعملي حسابك ان السنه الجايه اللي قربت هايبقى
ليكي مخصوص كل يوم امتحان وهاهريكي اسئله

دا انتي غاليه عندي اوي

عزيزي دياصتي اتلم انت و ماستر عشان ما خسرش صيام السنه دي عليكم
مش كل سنه حد يضيعلي الشهر الكريم اونطه ف قلة ادب

من طرف amalgam 2/9/2008, 1:30 pm

يا حراااام
صعبتي علي خااااااالص

سؤالي بسييييييط خااااالص

اخدتي فكرة وحشة عن دكتور كبير وبعدين غيرتي رايك؟

انتي صريحة وللا مجاملة؟

لو زعلتي من صحبتك هتتجنبيها وتشيلي في نفسك وللا تقوليلها ؟

بعد التخرج ان شاء الله مين اهم عندك الشغل وللا البيت؟
والشغل مهم حتى لو مفيش عائد مادي مشجع؟
ويهمك نوع البيشنت ومكان الشغل؟
يعني انتي مع شغل الحكومة وللا الخاص؟

كفاية عليكي كده
اسبوع كتير اوي
كفاية 3 ايام بس

من طرف amr_yadak 2/9/2008, 4:26 pm

هو الكل بيسال كده ليه ... اظاهر انتي غاليه اوي عند الكل ... والكل عاوز يخلص حقه منك
ما علينا انا في راي 3 ايام على زمة التحقيق كفايه اوي دا النيابه بتاخد 4 ايام بس

الاسئله : بس لو خسرتي اصحابك انا مليش دعوة
1- هل انتي بتثقي في اصحابك الانتيم ؟؟؟؟ ولأي درجه ؟
2- لو في واحده جات قالت لك ان وحده تانيه صحبتك (( الانتيم )) قالت عليكي كلمة بضايقك .. واكيد طبعا هي عرفه انها بضايقك ... هتتصرفي معاها ازاي ؟؟
3- هل انتي بتسامحي بسرعة ولا بتشيلي ؟؟؟
4- طيب لو سامحتي هتقبلي ان علاقتك بصحبتك دي هترجع زي الاول .. ولا اااااااا ؟؟
5- هل انتي عندك استعداد انك (( تبيعي )) صحبتك في مصلحة مصيريه بالنسبة لك ؟؟ وخلي بالك من مصيريه دي
6- هل في حد من اللي حواليكي انتي ممكن تاتمنيه على سر مهم ليكي .. ؟؟ ولا لسه مقابلتيش حد كده
7- ايه شعورك دلوقتي من ناحية نفسك بالنسبة لاصحابك ... يعني ... هل انتي راضيه عن نفسك معاهم ؟؟

كفايه كده لاحسن اخربها خالص

plllllllllz

ومتنسيش لما تخلصي اجابة عن الاستجوابات دي .. ابقي اختاري حد يقعد مكانك وابقي بلغيه انه على الكرسي

من طرف twolights 2/9/2008, 6:26 pm

ايه لونك المفضل ؟

البينك

ايه الموقف اللي حصلك قبل كده و مش عايزه تفتكريه ؟

الموقف اللى اتسرقت فيه

ايه الهدف اللي حققتيه و كنتي سعيده جدا بيه ؟

لما بختار صح ببقى سعيده جدا ولما حققت هدفى ودخلت اسنان كنت سعيده جدا جدا

و ايه الهدف اللي لسه ما حققتيهوش ؟

كتييييييييير

و ايه هدفك الاكبر في الحياه ؟

انى ارضى ماما وبابا

ين اكتر شخص بتحبيه في حياتك ؟

امى

ايه الحاجه اللي بتدوري عليها في حياتك ؟ ( الاجابه كلمه واحده بس )

الحنان

لو هتوصفي نفسك في تلات كلمات بس هتقولي ايه ؟

عاقله...طيبه...رومانسيه

تولايتس شخصيه صريحه ؟ و لا مجامله معظم الوقت ؟

صريحه الحمد لله ومش بجامل حد الا لما يستحق المجامله دى

تولايتس مع المثل اللي بيقول ( اصرف ما في الجيب ياتيك ما في الغيب ) و لا ( القرش الابيض ينفع في اليوم الاخضر )

كان على ايامى اليوم الابيض....صحيح دنيا ملهاش امان
لا مع ده ولا ده....انا مع متطلباتى واحتياجاتى...وظروفى ف الوقت ده
يعنى لو محتاجه حاجه واقدر اجيبها هجبها....لكن لو فى حاجه اهم منها واللى معايا يجيب حاجه واحده بس هجيب الاهم...واحاول اعمل اللى اقدر عليه عشان اجيب اللى عاوزاه

ايه احتر نصيحه حد نصحهالك و فادتك ؟ و مين الشخص ده ؟

حب لنفسك كما تحب لاخيك....واللى نصحتنى بيه امى

ايه اكتر مثل شعبي بتحبيه ؟

يا ماْمنه للرجال ...يا ماْمنه للميه ف الغربال

ha ha ha ha

تولايتس والثقه في النفس ؟؟ و هل في اوقات بتكوني فيها مغروره ؟

ثقه بنسبه 90% لكن عمرى ما بوصل للغرور الحمد لله
دايما ف قلقل وخوف ف معظم قرارتى...يعنى مش باخد قرار بسهوله...لازم افكر فيه كتير وقبل ما اخطى خطوه بعملها الف حساب....وايام الامتحانات ممكن تصل الثقه لصفر

لو لاقيتي الفانوس بتاع علاء الدين و طلعلك المارد و قلك تطلبي حاجه واحده بس هتكون ايه الحاجه دي ؟ و ليه ؟

هطلب الحب
لانه بقى نادر دلوقتى...معظم الناس بقت وحشه وفيها خبث ولئم ونيتها مش صافيه ف التعامل
وانا بطلب الحب بصفه عامه...يعنى نفسى كل الناس تتعامل بحب واخلاص...هتبقى الحياه جميله جدا جدا

تولايتس دينيا ؟؟

الحمد لله...راضيه عن علاقتى بربنا سبحانه وتعالى

ايه الدعاء اللي بتحبيه جدا ؟ و لو في حد بيدعيهولك هو مين ؟

** اللهم انت ربى لا اله الا انت....خلقتنى وانا عبدك...وانا على عهدك ووعدك ما استطعت...اعوذ بك من شر ما صنعت...ابوءلك بنعمتك على...وابوء بذنبى..فاغفر لى...فانه لا يغفر الذنوب الا انت-**

** يا حى يا قيوم برحمتك استغيث...اصلح لى شانى كله..ولا تكلنى الا نفسى طرفه عين**

انا بدعيهم لنفسى واكيد اى حد بيبحبنى بيدعيلى

سوبر

من طرف twolights 2/9/2008, 6:32 pm

فاصل ونعود

shereer

اسئله السوبر كتير...وتعبت بصراحه
وهكمل الباقى يا شباب بس مش دلوقتى
مع كرسى الاعتراف ...اوعى تغير المحطه ha ha ha ha