رد: صفة تضايقك في شخصيتك ؟؟ اذكرها ولا تخجل ؟؟

من طرف loooky 16/8/2008, 2:12 pm

على فكرة الكتمان يا جماعة حاجة كويسة فأحيان وأحيان تانية لا
بالذات أقرب الناس زي ما بتقولي يا مون لايت !!!!!!!!!!!!!!!!
يعني لو مش هتحكي لأقرب الناس هتحكي لمين!!
الفكرة فانك تحكي مش انك تشتكي ولا انك تدوري على حل هي الفكرة كلها انك ترتاحي الحمل اللي كلنا بنتحمله لو وزعته بينك وبين حد قريب منك هيخف عنك ولما يحكيلك هيخف عنه!!!
والله بجد يمكن مفيش أي حاجه هتتغير بس هو كفاية انه يسمعك وانت تسمعه عشان كده أنا بحب أوي اسمع اصحابي بالعكس ببقى نفسي أسمعلهم عشان عارف ان ده هيريحهم ولو مقلتش أي حاجه
طيب هقولكم على حاجه اللي دخلوا الموضوع ده واتكلموا عن الحاجات اللي مضايقاهم فشخصيتهم والحاجات الي مش بيحبوها مش استريحوا شوية مش حسوا انهم مش لوحدهم وان كلنا فينا مشاكل وان............ وان يد الله مع الجماعه
بلاش تفرض على نفسك انها تحمل فوق طاقتها انا عن نفسي محبش أبدا ان صاحبي أو الشخص اللي بحبه يكون في مشكلة أو مشاكل وميقوليش وميحكيش لأني بعتبر كده انه مش مستأمني أو مش بيحبني زي ما بحبه
واجب عليه يحكي وواجب عليا أشيل معاه حمله
يا جماعه محدش عمره يشيل الحمل لوحده ويعرف يستحمل هيتعب والله فالاخر وهييجي على صحته
الرسول لما جه يهاجر وهو خير الخلق مقالش مش هشيل حد الهم ومش هعرض حد للخطر معايا!!!!!!!!!!!! لا خد حبيبه وصاحبه أبو بكر ولما أبو بكر خاف قال للنبي لو نظر أحدهم لنعله لرآنا ساعتها الرسول طمنه وقاله ما ظنك باثنين الله ثالثهما
بس كانو اتنين
دا رأيي فموضوع الكتمان ......................!!!!!!!!

بينما الزهق ده بقى يا نيهو أنا عن نفسي ملول جدا عارفه أحيانا أمسك القصة أقراها أقلب 10 صفح ب10 صفح عشان أشوف الاحداث ماشية ازاي واخلصها فنص ساعه وارميها
وهكذا فحاجات كتيرة بزهق بسرعه جدا
بس دي حلها واحد
انما الحلم بالتحلم
يعني بالتدريب على الصبر وتعويد النفس
زي أي حد بيحاول يبقى رياضي بيبدأ يلف التراك أول مرة مرة واحده ومشي
وبعدين يبقى مرة جري ومرة مشي وهكذا لحد ما يبدأ الموضوع يبقى سهل ونفسه يبقى طويل
كفايه كده عليكو صدعتكو

من طرف tifour 16/8/2008, 3:01 pm

كلامك حلو

بس زهقني و انا بقراه

يا اخي زهقتني رغاي

من طرف loooky 16/8/2008, 3:10 pm

ههههههههههههههههههههههه

أنا موش مزعلني غير ان مووون لايت شالت ردها

من طرف down_2_u 16/8/2008, 3:29 pm

كلامك جميل اوي يا لوكي ربنا يخليك للبشر

من طرف MoonLight 16/8/2008, 6:34 pm

لا متزعلش يا لووكي
انا شلته عشان مكانش حد رد عليا
بس انا ليا الشرف انك قريته ورديت واهتميت

بصراحة كلامك كله صح وعجبني جدا
فعلا زي ما قلت اهم حاجة اني احكي لاي حد قريب مني
حتى لو مفيش حاجة اتغيرت ولا لقيت حل
مع اني مبعرفش اعبر عن اللي جوايا بسهولة

وبرضه زي ما قلت اني لما دخلت الموضوع ده فعلا استريحت شوية وحسيت اني مش لوحدي
وهحاول اعمل بنصيحتك وماحملش نفسي فوق طاقتها

ومتشكرة تاني على الاهتمام

من طرف neho 16/8/2008, 8:41 pm

ايه الكلام الكبير ده
كلامك صح يا لوووكى
بس هى الفكرة عندى انى مش بحب احكى بس مش عارفة ليه وعندك حق فى الجزئية بتاعة انى لما كتبت هنا حسيت انى استريحت ماشى
عموما هحاول
فى موضوع الزهق ده
انا معاك فى موضوع الصبر ده عموما انا بحاول اصبر واتاقلم
عموما بردو هحاول اصبر اكتر
شكرا يا لووووكى

من طرف master_dentist 17/8/2008, 3:07 pm

كلامك درر يا لووكى

جميل والله جميل

انا بقى عندى مشكله تانيه انا حاسس ان الناس اتصدمت لما عرفت شخصيتى الحقيقيه

لو سمحتوا حد يقولى السبب

من طرف down_2_u 19/8/2008, 6:18 pm

ليه بس بتقول كده؟ انا شايفه ان كلامك مفهوش حاجه غريبه كلنا فينا عيوب ومفيش حد ملاك

وانا شخصيا متصدمتش والي اتصدم يقول وميخفش ده حتي ماستر طيب smilllly

من طرف down_2_u 19/8/2008, 6:24 pm

يا مون لايت ليه شلتي ردك متزعليش اكيد دي غلطه مش مقصوده والله بس انا فكره اني رديت عليكي؟ والله كلنا مهتمين ومتقوليش كده ومش تزعلي كلنا اخوات واصحاب ولا ايه؟؟؟؟؟؟؟؟؟؟؟؟

من طرف down_2_u 19/8/2008, 6:30 pm

انا كنت عوزه اخد رايكو فيحاجه؟
انا لما بكون شايله من حد او متضايقه منه بيبان عايا قوي لما بتعامل معاه او بييجي يكلمني ومش بعرف اضحكله انا مشبحب انافق وكمان لاني شفافه والي جوايا بيبان

اكيد حد هيقولي طب ممكن تعاتبيه؟

انا طبعا هعاتبه بس لما يكون حد قريب مني
بس لو حد عادي خالص وعلاقه سطحيه بس بيكون فيه احتكاك وكمان مينعش اعلتب لاننا مش اصحاب ايه رايكو؟

من طرف MoonLight 19/8/2008, 11:31 pm

ربنا يخليكي يا داون تو يو
طبعا كلنا اخوات واصحاب
وانا مش زعلانة ولا حاجة

مفيهاش حاجة ان اللي جواكي بيبان عليكي ومش بتعرفي تخبي
اكيد في ناس كتير زيك وانا منهم
وزي ما قلتي لو حد قريب منك هتعاتبيه ولو مش قريب منك خلاص مش مهم
وبعدين دي ميزة مش عيب فيكي
ده رأيي

وشكرا
:lol!:

من طرف down_2_u 19/8/2008, 11:35 pm

شكرا علي رايك يا مون
انا برضو شايفه كده بس ده ممكن يزعل ناس كتير او يقولو دي رخمه مثلا

من طرف amalgam 20/8/2008, 12:28 am

قطع لسان اللي يقول كده :lol!:

من طرف twolights 20/8/2008, 5:48 am

دى ميزه حلوه اوى يا داون تو يو
واغلب الناس كدا وانا منهم
لو حد زعلنى او ضايقنى وهو مش يهمنى مش بعرف اتعامل معاه بعد كدا
فبتجنب انى اعامله تانى وخلاص
وبناقص راى شخص ف المليون اللى تعرفيهم

كبرى دماغك من اللى يقول عليكى رخمه
اقطع لسااااااااااانه على راى امالجم

من طرف down_2_u 20/8/2008, 5:57 pm

ربنا يخليكو ليه وتدافعو عني علي طول

مين تاني ياجماعه عاوز يفتح قلبه معانا

من طرف tifour 22/8/2008, 5:41 am

هو انا رأيي حاجه

ماسمهاش منافقه لما اللي قدامك تكوني شايله منه وكاتمه

لأن انتي لو خزقتي عين كل واحد دايقك هاتخسري كل الناس
والحياه هاتعلمك ازاي تبقي دبلوماسيه مع الناس
وتتقبلي كلامهم الرخم و تردي عليه بشياكه جدا و توصلي المعلومه لحد الدماغ و احنا اصحاب و حبايب كمان يا عم

كون انه يتقال عليكي رخمه لأ طبعا يبان عليكي .....و ايه يعني
لازم اللي غلط يعرف انه غلط
بس ما يبقاش رد فعلك سريع واهوج
فكري ف الكلام او الموقف و شوفي قصد اللي قدامك ايه
لأن انتي لو ما تعرفهوش ...ما تقدريش تحكمي على تصرفه و تفهمي نيته و بالتالي فهمتيه غلط..و تخسري انسان جايز.....تندمي بعد كده انك خسرتيه.

قطع لسان اللي يقول كده

هناء و شيرين اختين حلوين
العالمه و الندابه

من طرف down_2_u 22/8/2008, 2:27 pm

والحياه هاتعلمك ازاي تبقي دبلوماسيه مع الناس
وتتقبلي كلامهم الرخم و تردي عليه بشياكه جدا و توصلي المعلومه لحد الدماغ و احنا اصحاب و حبايب كمان يا عم

انا نفسي اتعلم كده ومش عارفه ازاي

مهي المشكله اني حساسه وبتقفل بسرعه

من طرف tifour 22/8/2008, 10:56 pm

يا اختي ما احنا مش جبلات

بس انتي كل ما بتقابلي حد انتي ما تركزيش على فعله
ركزي على رد فعله
اتعلمي منه
لازم هايعجبك من دا تصرف و من دا حركة ودان او غمزة عين
و بكدا انتي بتعدلي شخصيتك اللي متكونه
و بتبداي في بلورة الشخصيه الى الاحسن
وبتكسبي خبرات من الناس اللي انتي بتحتكي بيهم

لكنك لو قفلتي بسرعه عشان حساسه هاتبقي شخصيه ثابته
غير متغيره بتغير الزمن و تقدم العمر و هاتخسري حاجه واحده اسمها
نضج الفكر و الشخصيه

من طرف master_dentist 23/8/2008, 2:32 am

كلامك زين والله زين يا تيفور

يا داون لو مش عارفه اتعلمى من زماليلك واصحابك
اكيد فى حد بيعرف يتعامل كويس بدون حساسيه واكيد فى ناس بتقولوا حاجات بدايقوا

شوفى هو حيرد ازاى وحيبقى رد فعله ازاى وحاولى تقليديه وانتى حتتحسنى وممكن تبقى احسن من اللى حواليكى كلهم

لان لازم تقتنعى من جواكى انك تقدرى تتغيرى للاحسن

ولو فشلتى مره يبقى قدامك 999 مره تجربى فيهم تانى

من طرف loooky 23/8/2008, 1:29 pm

ايه الحلاوة دي يا تيفوور كلامك جامد والله tmam

من طرف loooky 23/8/2008, 1:34 pm

بس أنا رأيي حاجه
أنا عن نفسي لما بزعل من حد يهمني بقوله على طول ومابخبيش لو
أنا فعلا اهمه هيعتذر أو يبرر موقفه
أما لو حد ما يستاهلش موش هعبره ممكن أتجنبه تماما ولا كأنه موجود
وممكن لو الدنيا فرضت عليا اللي أنا موش طايقه ده أتعامل معاه بكل بساطه هتعامل معاه بأصلي يعني بالذوق
بس دا لايمنع ان في ناس لو قدرت تديهم على دماغهم اديهم عشان لو معاملتش كده هيطلعو فيها بزياده وهما أصلا ولا حاجه

وأتعب من ناداك من لا تجيبه *وأغيظ من عاداك من لا تشاكل
لا تجادل الأحمق حتى لا يخطئ الناس في التفريق بينكما

من طرف tifour 23/8/2008, 10:34 pm

قفايا اهو ياد

و ريني شطارتك

من طرف loooky 24/8/2008, 9:50 am

لا كان ولا عاش ولا أي حاجة خالص اللي يقدر يستجري يفكر ييجي يمك يا باشا plllllllllz

دا الكبييير كبيييير وعمر العين ما تعلى عالحاجب ياباشا

من طرف down_2_u 24/8/2008, 6:11 pm

والله يادكتور انا فعلا اكتر حاجه ملاحظاها في نفسي اني بحاول اتعلم من الناس كل حاجه حلوه
وبحب اطور نفسي ومش بحب اكون شخصيه ثابته انا مش كده خالص بس في نفس الوقت حساسه جدا وبقفل بسرعه وللاسف مش عارفه اتحكم في ده

بس انتي كل ما بتقابلي حد انتي ما تركزيش على فعله
ركزي على رد فعله
مش فهمه الحته دي ممكن تبسطهالي يعني ازاي؟

من طرف neho 25/8/2008, 5:03 pm

أزيك يا داون تويو
بصى انا من وجهة نظرى حاولى تكبرى دماغك وخصوصا لو ان الحد ده ميفرقش معاكى
وممكن توجهى تفكيرك فى جزئية تانية وهى ان انتى تحاولى مثلا تلاقيله عذر
وعلى مقدار معزتك للشخصية هيكون مقدار زعلك منها
يعنى لو الشخصية متفرقش معاكى خلاص تزعلى منها ليه فكك منها يعنى متركزيش معاها

اما الشخصية لو تهمك فاعملى حاجة من اتنين
يا اما تعاتبيه ,يا اما لو تقدرى تسامحيها سامحيها بس بشرط مش مجرد انك تقولى انك سامحتيها وخلاص لا لازم من جواكى بجد تكونى سا محتيها وصافيه من ناحيتها بجد لانك لو مكونتيش صافيه من ناحيتها اى موقف هيحصل تانى بينكم هتبدأى تفتكرى اللى حصل قبل كده والدنيا تكلكع اكتر
وفى الحالة دى يبقى العتاب احسن

ولو انتى معتقدة ان حد هيعتبرك رخمة مش مهم المهم انتى معتقدة ايه فى نفسك شايفة نفسك ايه دى الاولوية الاولى بعد كده تيجى وجهة نظر الناس
طبعا وجهة نظر الناس مفيدة فى انك ممكن تعرفى منهم ايجابياتك وسلبياتك فتعززى ايجابياتك وتحاولى تشيلى السلبيات

فكرة انك عايزة تتعلمى تبقى دبلوماسية بقى ممكن تغمضى عينك وتحطى نفسك فى موقف هيتطلب منك انك تبقى دبلوماسية وفكرى هتردى ازاى وهتعملى ايه ودربى نفسك على الموضوع ده
وممكن تشوفى حد انتى شايفة انه دبلوماسى وشوفيه بيتصرف ازاى واتعلمى منه