الحجاب و البطولة "الكيبوردية"!

من طرف dr_mony_2010 11/7/2008, 9:42 pm

توضيح صغير "كيبوردية" يكشف عنها فى "كيبورد Keyboard "

ضد الحجاب.. مع الحجاب ... والبطولة "الكيبوردية"!

الحجاب و البطولة "الكيبوردية"! Sahsah_22

منذ حوالي عامين تقريبا -قبل شهرة موقع الفيس بوك- كانت قناة النيل الثقافية تعرض حلقة من برنامج "كتب ممنوعة"، استضاف "جمال الشاعر" في تلك الحلقة الصحفية "إقبال بركة" وأحد علماء الأزهر الشريف.. أظن أن القارئ قد خمّن الآن ماهية الحلقة، تمام.. الحلقة كانت عن مناقشة كتاب "الحجاب - رؤية عصرية" للكاتبة، وطبعًا يمتد الحديث إلى عدة أسئلة جدلية: "هل هو فرض ديني؟، أم (كلكيعة) على رأس المجتمع المصري؟، وأحد أهم إشارات العنف الذكوري البكتيري الفيروسي ضد المرأة؟.. على أساس أن كل من ترتدي الحجاب تعطي الفرصة للرجل في إيجاد وسيلة سريعة للتعامل العنيف معها، كأن يستغل الطرحة أو الإيشارب في توثيقها إلى رجل "ترابيزة" مجهولة الهوية في (سندرة) المنزل! كان النقاش محتدمًا.. فرض، لا ليس فرضًا، تخلف ورجعية، لا تنوير وتقدم.. الحجاب يقلل من فرص المرأة في العمل والحياة -نظرية رِجْل الترابيزة!- لا الحجاب.... استمر النقاش بهذه الطريقة إلى أن أدرك شهرزاد الصباح، فسكتت عن الكلام المباح!

أثناء الحلقة قلت لنفسي: "طيب وإحنا ما لنا بهذا النقاش العقيم؟!"، هي مصر انتهت منها المشاكل حتى نناقش ما إذا كان الحجاب سبب مشاكل مصر جمعاء، وسبب تخلف مصر عن ركب الدول المتقدمة -آه والله كان كلام الأستاذة "إقبال" يصرح بهذا بالفعل- وماذا عاد عليّ أنا كمشاهد عادي من هذه المناقشة الجدلية العقيمة المعروف نهايتها ونتائجها مقدمًا "يبقى الحال على ما هو عليه"، وثورة من الشباب المتدين، أو "المتدين من بعيد لبعيد"، وفتح حلقات نقاش وشتيمة، بالإضافة إلى إهدار دم الكاتبة -كنوع من أنواع البطولة- وشهرة لا بأس بها تمتعت بها، حتى لو كان الرأي العام في الاتجاه المضاد، كاتبة السطور لم تعرف "إقبال بركة" كشخصية إلا من خلال جدلها العقيم المتواصل في هذا الموضوع، وحتى لا أكون ظالمة، عرفتها (كمجرد اسم) من إعلانات التليفزيون القديمة عن مجلة حواء الصادرة عن دار الهلال!

السؤال: هل المشاكل انتهت من مصر حتى تصبح مشكلة الحجاب هي الشغل الشاغل لشباب مصر؟ والدليل في موقع "الفيس بوك"، وصلتني دعوة للانضمام لـ"جروب".. (ضد جروب اليوم العالمي لنزع الحجاب)، بالمناسبة تم اختراق الجروب -اليوم العالمي لنزع الحجاب- لإهانته للإسلام -كما قال المخترق- الطريف أن المخترق أطلق على نفسه Mr. Devil يعني "الشيطان"!، كم التعليقات -عفوًا الشتائم- وكم المنضمّين -شباب كلهم- للمجموعات المعارضة يشعرك بالحسرة "يااااه.. لهذه الدرجة توجد إيجابية كلامية كيبوردية!".. على فكرة عدد المجموعات "Groups" الخاصة بالحجاب حوالي 142 بينها المؤيد والمعارض "من غير حجاب أحلى"، "بالحجاب إنتِ أحلى"، -الجروب ده لو وصل لـ10000- "هنرجّع الاحترام للحجاب" -ما شاء الله على أساس إنه قليل الأدب مثلا!- "الحجاب ليس فريضة دينية ولا واجبًا شرعيًا"، وغيره وغيره وغيره!

طبعًا هناك من سيقول: "وأنتِ ما لك؟ لازم ننصر الحجاب ونكون إيجابيين"،على عيني وعلى رأسي.. لكن هل قضية الحجاب هي قضية الساعة؟ والتعليم والصحة والتلوّث والفساد و...؟.. وهل ظهور المجموعات المناهضة لارتداء الحجاب ستجعل الفتيات يخلعن الحجاب ببساطة؟ طبعًا لا.. أنا شخصيًا هذه المجموعات تثير ضحكي -على أساس إني ما هاصدق وأخلع الحجاب!- وتضحكني أكثر المجموعات التي تدعو لإغلاق المجموعات الأولى؛ لأنها تجعلني أسأل سؤالاً ساذجا: كيف كنت سأعرف أن هناك من يناهض الحجاب بـ "جروب" على (الفيس بوك) إلا من خلال الجروب الذي يدعوني للانضمام لغلق الجروب المناهض؟ يعني "ياللي مش عارف اعرف!"..

إذا كنت معترضاً على الفكرة بالأساس.. لماذا تجلب لها شهرة أكبر بالمعارضة الحنجورية؟.. متأكدة أن هناك من سيعتقد أني ضد الحجاب؛ لأني أطالب بعدم تضييع الوقت في بطولات زائفة "اختراق الجروب" أيّ نصْر وأنت جالس على النت كافيه أو في بيتكم بلا شغلة؟.. أي إيجابية في ذلك وإنت "مش لاقي تاكل؟!"، أي إيجابية بالذمة؟!.. تقريبًا أعرف الرد جيدًا.. "مش لازم نحافظ على المجتمع من اللي بيلبسوا ضيق وقصير ومن اللي عايزين مصر كباريه كبير.. ولا إيه؟!!".. لأ.. ونِعم الإيجابية![/center]

من طرف battota 12/7/2008, 11:09 am

شكرا يا موني على طرح موضوع زي ده

بس هقول حاجه ف البدايه

ددايما تلاحظي كل فتره يظهر موضوع يعمل شوشره وبلبه

ف العالم العربي او العالم كله

ودايما الموضوع ده بيكون بيمس العقائد والديانات بتاع الشعوب

ليييييييييييه؟؟؟؟؟؟؟؟

عشان الدنيا كلها تقوم وممتقعدش

سواء ناس معتدلين او متشددين اوناس ملهاش فاي حاجه بس مع الموجه وخلاص

دي سياسه دول

يعني يلهو شعبهم ف حاجه دينيه عشان اغراض تانيه ف نفسهم

ويثيروا مواضيع ملهاش اي لزمه بس بيحسسك انها مشكله مهمه جدااااااااااااا

مننكرش طبعا ان الحجاب فرض

يعني مفيهوش كلام تاني غير كده

وانا عن نفسي لما الاقي اي حد بيتكلم ف الموضوع ده بالذات

على انه رجعيه او تخلف او بيبوظ الشعر او بيزيد تخلف اللي لابساه
او بيقيدها ويخليها جاريه او...او...او........الخ

ويتكلمو عن حريه المراه(لازم تمشي عريانه عشان تبين للناس انها واخده حريتها ع الاخر)

بغير القناه على طول قبل ماكسر التلفزيون

لان بصراحه كلام ميستاهلش اضيع وقتي عشان اسمعه

مش كل الي يتكلم نسمعله

من طرف pedo 12/7/2008, 1:08 pm

السلام عليكم
كان في حديث عن رسول الله (ص) كان بيقول فيما معناه " من رأي احدكم منكرا فيغيره بيده فان لم يستطع فبلسانه فان لم يستطع فبقلبه وهذا اضعف الايمان " صدق رسول الله ( ص) وبكده انا لما هشارك وهاقول رأيي في حاجه انا شايفها غلط من وجهه نظري هاكون دافعت عن الصح من وجهه نظري بردو لان الصح والغلط مسأله نسبيه
وبالمناسبه انا اصلا مش بخش الجروبات دي لانها مش تخصني بس حبيت بس اقول رايي في الموضوع ككل

من طرف dr_mony_2010 16/7/2008, 8:29 pm

بطوطة انا معاكى ان كتير بيفتحوا الموضوع ده عشان البلبلة أو عايزين يتشهروا ..
أنا مش بتكلم فى الموضوع عن فرض الحجاب فى حد ذاته لأن دا فرض و دا موضوع مش فيه نقاش ... الحجاب زيه زى الصلاه أو الزماه فرض على المسلمة ..
أنا بتكلم عن الناس اللى بتناقش الموضوع دا أساسا ...
أحنا المفروض نعمل ايه .. هل نتجاهلمه و بكده يفقدوا الدافع الاساسى اللى هو البروباجندا ولا نناقش بالمنطق لحد منفهمهم ؟؟؟

من طرف vezant 20/7/2008, 12:49 am

انا معاكي يا موني في حاجه
وهي اذا كانت نتيجه الجدال والنقاش والجروب والجروب المعارض ليه في اي حاجه مش في الحجاب بس معروفه مسبقا في ملهاش لزمه
وبعدين دي حاجه من منظومه التخلف اللي عايشين فيه وبيه

من طرف vezant 20/7/2008, 1:03 am

معلش نسيتاقول حاجه
بالنسبه للشباب اللي بتلاقيه بيشتم عل الجروبات وفي الرومات
وقال يعني بيدافع عن قضيه بالشتيمه ده برده من التخلف والغباء والجبن اللي وصلناله
وربنا يصلح الاحوال

من طرف samar yousif 26/9/2008, 9:49 pm

موضوع مهم جدا يا موني .. و من أكتر الحاجات المستفزة فعلا ع الفيس بوك ..

و زيها طبعا الجروبس اللي بتجمع مليون صوت لغلق جروب لـ ..... الرسول " صلى الله عليه و سلم "

فعلا الحاجات دي بتلهينا عن حاجات أساسية في الدين ..

بتخلي اللي قاعد 24 ساعة ع النت و ع الفيس بوك بيشيت و لا بيعمل أي حاجة تانية و مضيع صلاة اليوم مثلا .. بيحس إنه خلاص محى ذنوبه و ساهم في نصرة الرسول " صلى الله عليه و سلم " و كفر عن سيئات اليوم لما عمل جوين للجروب دا أو غيره ..

طبعا كلام فارغ .. و زي ما ناس هدفها انهم يعملوا بروباجندا لنفسهم و احنا بنساعدهم في كدا ..
فناس تانية بردو هدفها انها تلهينا عن ديننا الفعلي مش القولي أو الكتابي ..

أنا عن نفسي مش باعمل جوين لأي جروب من دول ..

الحجاب و البطولة "الكيبوردية"!

الحجاب و البطولة "الكيبوردية"!

رد: الحجاب و البطولة "الكيبوردية"!

رد: الحجاب و البطولة "الكيبوردية"!

رد: الحجاب و البطولة "الكيبوردية"!

رد: الحجاب و البطولة "الكيبوردية"!

رد: الحجاب و البطولة "الكيبوردية"!

رد: الحجاب و البطولة "الكيبوردية"!