جمــــهورية كــــوسة ستــــان

من طرف battota 19/4/2008, 12:22 pm

ماذا تعنى جمهوركية
فى بلاد كوسة ستان توصل الزعيم القائد والأب الروحى لافاش كيرى الى اسلوب مميز وفريد فى ادارة البلاد وهو الجمهوركية وهو حلقة وسيطة بين الجمهورية والملكية حيث يتم انتخاب الرئيس بانتخابات بيقولوا عليها خالتى نزيهة ويمكن توريث الحكم فالسلالة الراقية للزعيم والقائد والأب الروحى لابد أن تظل فى السلطة
جمهوركية كوسة ستان الديمقراطية
فى يوم من الأيام وبينما الزعيم القائد والأب الروحى ممدد على سريره الوثير وبجواره السيدة قرينته أم سحلول وهو يشاهد قناة البحيرة الأخبارية
- ايه ده مين الناس دول وعاوزين ايه ؟
- مفيش يا حبى دول 60.5 مليون من الشعب عاملين مظاهرات
- هم دول بقى بتوع المعارضة اللى قارفنى
- أيوة يا حبيبى دول قلة غير واعية مندسة تطمح للوصول الى أطماعهم الشخصية
- كلمينى بالبلدى ده أنا اللى معلمك البقين دول
- يعنى عاوزين يعدلوا الدستور واصلاح وكلام فارغ من ده
- اصلاح ايه هو احنا مش لسة مصلحين حنفية المطبخ اللى كانت بتخر
- لأ يا حبيبى عاوزين اصلاح سيااااااااااااااااسى
- آآآآآه قولتيلى طب وأنا أتصرف ازاى دى القوانين معمولة ليا مخصوص
- ولا يهمك يا حبيبى انت تطلع فى التلفزيون تقول ان انت هتعدل الدستور هتلاقى الشعب بقى بيهتف لك بعد ما كان بيشتمك
- انتى اجننتى يا أم سحلول أغيرلهم الدستور كده سحلول ممكن مايمسكش البلد دى بعدى مين اللى هيشكم........ آه أقصد هيحكم كوسة ستان بعدى
- ما تفتح مخك معايا ومتبقاش لا فاش بجد بقى . احنا هنعدل القوانين كده وكده
- يعنى ايه ؟!!
- أبسطهالك انت فاكر الأسطى قزعة المدكوك الترزى ؟
- أيوه ما أنا خليته رئيس مجلس الجزم
- بالضبط هنخليه يفصلك قوانين على مقاسك بالضبط تدى المعارضة حاجة باليمين وتاخد أكتر منها بالشمال وكده نبقى ضحكنا على الشعب نياها نياها نياهاهاهاهاهاهاها
- يا مااااااااااااااااااااااااااااااامىىىىىىىىىىىىىىىىى ىىىىىىىىىى
- فيه ايه يا أهبل انت ؟
- متضحكيش كدة تانى انت عارفة انى بخاف

فى الصباح الباكر جاء الأسطى قزعة المدكوك الترزى
- مرحب معالى فخامة وجلالة الزعيم القائد والأب الروحى
- أهلا ياد انت جيت ؟
- جيت آخد مقاسات معاليك للقوانين الجديدة مع انى لسة فاكر مقاساتك من آخر قانون تحب القوانين شكلها ايه
- بص أنا عاوز تشكيلة قوانين قضاء على حرية صحافة وكده يعنى بس يا ريت تكتر فيهم الأساتك وتكشكشهم من اليمين شوية
- ليه يا كبير ده أنا شايف ان ماشاء الله يعنى انت ربربت وتختخت وبقيت منتهى القلوظة
- انت جاى تقر عليا ولا ايه ؟
- هو هيحوق ؟
- انت بتقول ايه ؟
- بقول هو أنا أقدر أقر على مهجة قلبى وحبيب الشعب
- بحسب
- الحمد لله أنا ساقط حساب
- عاوز القوانين على امتى يا ريس
- أقرب فرصة؟

نجحت فكرة ام سحلول وبدأ الشعب يهتف باسم الزعيم
- الفساتين .......... أه اقصد القوانين خلصت يا أسطى مدكوك؟
- طبعا معاليك وبقت آخر قلسطة والله دا أنا يوم ورا يوم زعيمى ما جانى نوم زعيمى و أدينى جيت زعيمى و أدين جيت
- أنا عمرى ما كنت بخيييييييييييييييييييييييييل قوانينك عايشة جوايا ........... خبايا القانون فى ايدييييييييييييييييييييييييييييك أساتك ما لها نهاية

تدخل ام سحلول
- انتو بتغنوا يا هبل ؟
- ده أنا كنت بقيس القوانين يا حياتى بس طلع مقاسها جمييييييل جدا

يمر القانون من مجلس الطراطير ثم من مجلس الجزم فيصدم الشعب
- ايه ده انت مين ؟
- ايه مش عارفنى أنا اللى انت ذليته وحبسته 3 ساعات ونص فى المعتقل من عشرييييييييييين سنة
- يعنى مين
- أنا حسن الهلاالى

طنطن طن موسيقى تصويرية
- وعاوز ايه بقى يا سى حسن يا خولى الجنينة يا حسن
- جاى أخلص عليك وأشرب من دمك ............ بعد ما أحليه الأول طبعا بسكر التموين الحاجة الوحيدة اللى حلوة عندك
- يخرب بيتك يا أبو كرتونة عامللى فى التموين سكر وحلو كمان طب أما أشوفك
- مش هتلحق

و اقترب منه حسن الهلالى وفجأة ..............

استيقظ الزعيم