طعنة خنجر

فـ صمت جوارحي وعيوني


ألاقي دمعي يتكلم


بيتألـِّم


من الآهه


ومن غـَدرُه


ونبضة قلبي بتعَلـِّمْ


فـ جُدرانـُه


وبتقولـِّي


خـَلـَف وَعدُه


سنين عدت وداسها العمر


وكنـّا إتنين


انا وهيَ


نطوف الدنيا متعاهدين


علىَ الحلوة


وع المُرة


فـ بَر فـ بحر


وغطتنا خيوط الصبر


وظلتنا رموش العين


فـ بَرد وحَر


ويجي الليل بنتدفى


بنظرة حب


ونتلفلف


بلمسة شوق تطمنّا


ونتونّس بدق القلب


ويجي نهارنا نتحرّك


ونجري ويَّا نسمة صُبح


ونرمي ورانا أوجاعنا


وننسىَ كل آهه وجرح


ولما نجوع


يكفينا غدا العصفور


ولما تضلم الدنيا


عنينا النور


ولما الفقر يوجعنا


ويجي يلّوي فـ دراعنا


يداوي الصبر


وكانت ضيّـقة الدنيا


لكنْ كُنـّا طيور فيها


وبنعيشها


بأحزانها وبلاويها


ولا هاممنا


وبنغنّي


أهو الدنيا تعلمنا


ولما الصبر طال بينا


بدأت أحس بالوِحدة


وإن شريكتي فـ الدنيا


بقت شاردة


ابص فـ عينها مش لاقي


دوا قلبي


وألمس إيدها وكأني


لمست جدار حديد مبني ِ


وأحاول إني أسألها


وألاقي سكوتها وغموضها


يحيرني !


فـ إيه حالها ؟


أتاريها خلاص تِعبـِت


ولما طريقنا طال بيها


شافت شوفه


طريق أرْيَحْ


ومش محتاج تعب أو جوع


ومن أول خُطاها فيه


هتعلىَ لفوق


وتنساني


ولا يفرق فـ تفكيرها


ولا يفرق أبات موجوع


هيحصل ايه


أكيد العز بينسّي


وكتر المال بقا يقسّي


وقلبها إللي نَبْضُه حَنيْن


أكيد العِز وفلوسه


هيقتل حُبي ويدوسه


يفوته لمين


وزي ما قالِّي إحساسي


صِحيت يومها


لقيت الشمس مش طالعة


وكل الدنيا ليل ضَلمه


فـ عز الصُبح


وقلبي يدق مش قادر


أحوش دَقـه


وصوته بيعلىَ وبيعلىَ


وْنا سامع صريخ نبضه


وفجأة لقيت صريخ أعلىَ


ده صوت الباب


و حَد وراه


مصيبة أكيد وجيا لي


لقيت صاحبتها بتقولي


خلاص إنسىَ


حبيبتك باعت العِشرة


وجا لها إللي يتقـّـلها


وبألوفه بيوزنها


وبالعَشرة


خلاص إنسىَ وشوف نفسك


نسيت الدنيا وقتيها


وقدامي


فـ قلب مرايتي اُم الشرخ


لقيت نفسي


لقيت واحد صحيح شبهي


لكنْ بيني وبينه سنين


مصدقتش


وقلبي مش مبطل صرخ


وقولت مرايتي بتخونّي


مهي مراية


وقلبي يدق جوايا


هيتفرتك


وبينادي على البايعة


وبيبعني


وبيصوّت


" مليش فـ الدنيا مِن بَعدك "


ومـ الصدمة لقيت خنجر


لقيت راحتي فـ حضنه اْكبر


زرعته فـ قلبي المسكين


مهنش عليا اشوفه حزين


كفاية


إنها تفرح


وداع يا دنيتي المرة


عذابك كان أشد عذاب


عذابك مش سايبني أفرح


ولو لينا نعود مرة


أكيد هرفض يكونـ ـلي احباب


أكيد هرفض يكونـ ـلي احباب
__________________