أنا و المرتب و الزيادة

شكراً على الزيادة
وفرحــة البـلاد
يا مفرق السـعادة
ومشــبع الولاد
ومريح الغـلابة
فى الأيـام الشـداد
***
سبعين جنيه بحالهم
خالصين كدة بعبلهم
ما صدق جيبى طالهم
أيوب والصـبر زاد
سبعين جنيه بحالهم
يارب أشوف عدلهـم
مشتاق واستاهلهم
جايين لى ف الميعاد
***
وتانى يوم يا ريـس
نزلت أجيب حاجاتى
حسيت كأنى هاقـدر
أحـقق أمنيـاتى
محتـاج قميص لإبنى
ومبشـرة لمراتـى
وحتـة جبنة رومى
وجوز شـراب بناتى
واجيب لى كام فانلة
واجـدد كالســوناتى
ونفسى مرة واحدة
أدخـل محل حاتى
أغير طعم ريقى
مدمـس أو حـراتى
***
فجـأة لقيتنى تهت
معرفش إيه جرالى
مع الأسعار سرحت
ومرتبى الحـالى
اتبخرت الزيادة !!
ولاّ الطلب "غالى" ؟!
يا أهل الاقتصـاد
عايز دوا لحـالى
تعبت م الدكاترة
ومعدتى بتلالى
أبكى على بختى
ولاّ على عيالى
***
أستأذنك يا ريس
أنا واحد م الرعية
مش لابس رأى غيرى
وما لبستش قضية
وبعلن بس رأيي
لا سيف ولا بندقية
من يوم ما وعيت لنفسى
والحالة هية هية
شلة لصوص بتلهط
والجوع للأغلبية
***
يا ريس خلى بالك
أنا راجل مش هفية
فكر قبل الزيادة
ما أبقاش أنا الضحية
وصاحب أى سلعة
يقيد النار شوية
مرة بإس الحكومة
ومرة العصبجية
مش هفضل باقى عمرى
للاستغلال مطية
مش هستنى الزيادة
لو كانت مية مية
ما تزودنيش يا ريس
والتجار تضحك عليَّ
***
استأذنك يا ريس
من بعد الاحترام
بيتى والميزانية
علامة استفهام
مفيش هامش لربح
ولا للفسـاد لجــام
سهران أجْمَع واطَّرح
وارجع أتعب وأنام
وأقول لنفسى يمكن
اضبطها فى المنام
لا شفت عنب اليمن
ولا دقت بلح الشام
***
سبعين جنيه يا ريس
على كل بق كام
بطاطس وألا جبنة
أو حتى بيض يمام
وإن جبت مرة لحمة
أجيبها كام جرام
دايماً عامر بحسك
وتعيش لكل عام
شعبك أمير وطيب
ومش محتاج علام
متعود كل سـاعة
على شـدة الحـزام
***
مش آسف ع الصراحة
ولا قاصــد الخصــام
ولا نـاوى ع المجاملة
ولا باتحــدى النظــام
لكن فى القلب كلمة
تسوى كل الكلام
اللى بيجرى ف بلدنا
حرام.. حرام.. حرام