عاوز رأيكم بصراحة

الف مبروك لاخوك يا لووكى

وعقبالك ان شاء الله

الموضوع ده فعلا زاد عن حده اوى فى صرف الفلوس الكتير

بس مش عارفه هو لازم الناس تدفع المبالغ الضخمه دى فى الافراح

علشان يتقال ده عمل فرح ابنه مش عارفه فى مكان ايه؟؟ّّّ!!

يعنى ممكن تتعمل حاجه بسيطه وفى نفس الوقت الاهل ينبسطوا باولادهم

ويوفروا فعلا جزء من الفلوس يعملوا بيها حاجه تفيدهم برده

وبالنسبه للبنات اللى بتقول دى ليله العمراعمل فيها االلى انا عاوزاه

انا مش معاهم اصل هى مش هتفدنى باى حاجه
بالعكس زى مابيقول مالك الناس طول الفرح عماله تبحلق فيهم وتقول شايفه شكلها عامل ازاى سواء بالحلو او الوحش
بس مش عارفه ده معناه ان الناس متعملش افراح خالص

بس الموضوع ده يرجع للعروسين فى الاتفاق عليه

وربنا يهدى الجميع

مالها الأفراح الإسلاميه ؟فرح وحشمه واحترام وبعدين علي رأيك ماياخدو الفلوس يتفسحو بيها أو حتي يطلعو عمره

الف مبروك لاخوك يا لووكى :032:
وعقبالك قريب ان شاء الله

الفرح اهميته ف ايه؟؟
ان العلتين بيعرفوا بعض فيه ويعرفوا انهم بقوا عيله واحده
وانت وعروستك السبب ف ده
وكمان بتعرفها على كل عيلتك وهى كمان هتعرفك كل اهلها حتى اللى مسافر دايما بينزل عشان يحضر فرح قريبه

اما حكايه الفلوس فكل واحد يعمل الفرح على اده وملوش دعوه بحد يعنى ويكلف نفسه فوق طاقته مش لازم الكل يقول ده عمل او معملش او بخيل او كريم
ده حاجه ترجعلك انت وهى وعلى راى المثل
على اد لحافك مد رجليك

وبالنسبه لعروستك ..دلوقتى فى فساتين للمحجبات روعه وكلها احترام وهتتخفف الميكب بتاعها وتبقى محجبه
اما الزيطه...ممكن تعمل فرح اسلامى او تبقى موسيقى هاديه

ده راى واختلاف الراى لا يفسد للود قضيه

ألف مبروك
وعقبالك يا لوووووكي

بصراحه في ناس من اول حفله الخطوبه بيعملوها ليله زي الفرح ولازم قاعه ومصاريف
ويعزموا خلق الله كلهم

رغم ان فتره الخطوبه دي ماهي الا وعد بالزواج وفتره يتعرف فيها العيلتين على بعض ويكون فيها الشخص نفسه لغايه لما يجهز كل اللي اتفقو عليه وبعدها يجوزوا اذا كان في نصيب

والخطوبه المفروض تكون ف السر او عائليه جدا يعني اهل العروسه والعريس بس
ومتكونش مكلفه
لان لقدر الله ممكن ميحصلش نصيب وهتبقى مشكله بعد كده لو كان في صور او فيديو او صور على موبايلات الناس ومفرقينها

انا رغيت ومش عارفه وصلت لفين

اه افتكرت
اما الفرح

وده رايي

ان ممكن نعمل حفله بسيطه مع الاشهار ف المسجد او نادي او البيت
تهيص فيها العروسه مع صاحباتها وتفرح والناس يتفرجوا عليها
وممكن تعمله ف مكان مغلق وتلبس اللي هي عايزاه وتتزوق براحتها
لان اللي هيشوفوها بنات زيها(كده العريس مش هيغير او يقلق)
وبرده تنبه على الناس ان اللي هيصور اي صوره هيتحاسب عليها قدام ربنا لو ورتها لاي راجل

وممكن يهملو هدايا بسيطه مكتوب عليها اسمهم ويوزعوها على الناس
او اي افكار تانيه حلوه هما يبتكروها سوا

اما الفلوس اللي وفروها م القاعه والبوفيه والهيصه دي كلها
يا اما يكملو بيها حاجه ناقصاهم او الاحسن وده اللي افضله انهم يطلعو عمره اويكملو عليهم ويطلعو حج لان العمر ومشاغل الحياه والهموم بتلهينا عن فرصه العمره والحج واحيانا الظروف مش بتساعد ابدا بعد كده

يعني بصراحه هي فرصه لازم يغتنموها

مبروووووووووووووووووك لاخوك

وعقبالك

بس طبعا احنا الاول

اما بالنسبة لرايى


هوة عموما الموضوع دة بيرجع للعريس والعروسة
وامكانيات العريس
وظروفة
العملية مش عملية شنق او كتر مصاريف
بس كمان كل حد يفرح باسلوبة وعلى قدة
يعنى انا مثلا لو خطيبى جة قالى انا مش هقدر اعمل فرح او هنعمل فرح على الضيق
عادى طبعا هوافق او ممكن احاول اساعدة فى التكلفة
لكن لو هيقدر انة يعمل فرح طبعا هعمل فرح بس بردة مش بتكلفة عالية
يعنى مايوصلش للبزخ

الف مبروك لوكي وعقبالك
انا رايي دي ليله في العمر وكلنا بنتمناها واكيد ليله زي دي مش هتعدي كده من غير فرحه ولمه
بالنسبه لموضوع الفستان والميكب في دلوقت فساتين محجبات ومحترمه جدا وكمان الميكب البسيط هيكون افضل وده علي حسب عروستك لان في ناس مش بتحب البهرجه وبتحب البساطه
اما الفرح فمن رايي برضه البساطه ممكن فرح بسيط جا يعني انا اعرف افراح اتكلفت مثلا 3 الاف جنيهاوخمسه وبجد كانت حلوه جدا ووكلنا كنا مبسوطين انا رايي خير الامور الوسط في كل حاجه
انا اعرف ناس بدل ماتعمل فرح............طلعو عمره مع بعض يعني بداو حياتهم بطاعه وانا حابه الفكره دي جدا ونفسي بجد اعملها

الف مبروك لاخوك يا لووكي و عقبالك ان شاء الله

انا رأيي ان ممكن يتعمل فرح بسييط يعني مش لازم التكاليف الكبيره لان دي ليله واحده في العمر و دي ليله بتجمع فيها القرايب كلهم و بيتم فيها التعارف بين اهل العروسين و ممكن ببقيه الفلوس يتفسحوا في اي مكان او يعملوا عمره لان فعلا الحياه لو ابتدت بعمره ربنا هيبارك فيها ان شاء الله

طبعا يالووكي عشان احنا زملا زي ماقلت لك
احلى حاجة انهم يعملوا عمرة
وعجبتني اوي جملة انت قلتها

لأن الواحد لو بدأ عمره بعمرة تبقى حاجة روعة وربنا يكرمه فحياته كلها

اوعي انت ماتعزمناش علي فرح اخوك

هاللوا إفرى بدى

انا جيت نورت البيت

انا بالنسبالى اهم حاجه فى الفرح البوفيه ما دام متظبط مش مهم الباقى بقى
بعد كده العروسه للعريس والجرى للمتاعيس

وعلى فكره هى دى السنه


وملخص لما يجرى فى الفرح
اولا يستيقظ العريس من النوم وذهنه مشغول باللى حيحصل فى اليوم ده

وبعدين يستقبل الناس اللى عازمهم على الغدا او انه يكون عامل عشاء فى الفرح
( دى فيها 5 الاف جنيه على الاقل )

وبعدين يروح للحلاق او الكوافير

وبعدينيروح يجيب العروسه من الكوافير

وبعدين يروحوا يتصوروا فى الاستوديو

لحد هنا عادى وكويس المشكله فى اللى جاى

المشكله فى اللى جاى

العريس والعروسه يروحوا على القاعه ( على الاقل 8 الاف جنيه )
حوالى الساعه 10.5 ويدخلوا على اسماء الله الحسنى

وبعدين رقصه سلوا

وبعدين اغنية حتجوز او العنب بتاعة سعد الصغير

ويخرج الشباب والبنات ويلتف الشباب حول العريس
والبنات حولين العروسه وينهمك كل فريق فى الرقص


وكل فريق يتنافس فى الرقص والصبيان يتفرجوا على البناتن اللى بترقص
والبنات تتفرج على الصبيان اللى بترقص

ويجبر كل فريق انه يجبر العريس والعروسه انهم يرقصوا

وبعدين تورتة الفرح

ويقوم منسق الحفلات بتقديم الشوكه لكلا العروسين والكيام بالحكات البهلوانيه فى
اكل التورته بجميع الطرق الممكنه والغير ممكنه

وهكذا الحال فى الشربات

وبعدين الحاجه الساقعه تنزل للمعازيم



وبعدين الاغانى تشتغل تانى ويكملوا شوية رقص كمان لغايه الساعه واحده

وبعدين اصحاب القاعه يقولولك شطبنا

يعنى صرفتلك 10 او 12 الف فى ساعتين ونص


هل حد عنه برنامج تانى للفرح

اظن ان معظم الافراح بنفس الطريقه ونفس الروتين





وبعدين موضوع انها ليله فى العمر

انا شايف ان ده اختزال للحياه الزوجيه القادمه فى ليله واحده
وتسفيه لمعنى الجواز والهدف منه انك تبدأ حياه جديده مع اللى انت بتحبه وانك تكون اسره سعيده


مش مهم ان العريس والعروسه يقعدوا فى الكوشه والناس تتفرج عليهم

وبعدين اسالوا اللى تتجوزوا اتفرجوا على شريط الفرح كاممره بعد الفرح


الموضوع ده عايز شجاعه من العريس والعروسه ومادام هما بيحبوا بعض ( المفروض يعنى )
يبقى مش مهم راى الناس لان هما اللى حيتجوزوا مش الناس

وطبعا احلى حاجه انهم يبداوا عمرهم بعمل عمره

المهم مايختصروش المسافه ويقضوا العمره فى شرم



وسلام

انت اتجوزت قبل كدا ولا ايه يا ماستر!!!!!

حاش وماش
بقى انا وش ذلك برضه
ده بس من كتر الافراح اللى انا حضرتها انتى نسيتى ان عمرى 98 سنه ولا ايه

وانت ايه رايك يا عم سوبر فى موضع الفرح بتاععك
حتعمل فيه ايه

شكلك يا سوبر حتعمله فى عيادة الاوبيرتيف


وانت والعروسه حتخشوا بالبلاطى


وانتوا راكبين تك تك



واغنية الاستقبال







صوت صفير الكونترا