أنت ف كلية ايييييييييييه ؟؟؟؟

المشهد :-
سيادتك تايه ... مش عارف انت فين
بس المبنى شكله بتاع كليه ...كلية ايه بقى دا المهم ؟؟؟
هنبدأ من أم الفنون .....
ابتسم انت ف كلية الهندسه ( اصلها بقت نكتة .... بتفقع انا لما بشوف اليافطة دى )

1- لما مرة واحدة تحس ان الناس كلها شبه بعضها , ولاد و بنات مع انهم مش كدة , لكن التعبيرات اللى على وشوشهم واحدة




2- لما تلاقى الراجل اللى ع الباب بيدخل الناس كلها من غير ما يسألهم فين الكارنيه , لكن ييجى عندك انت و يمسكك , عرف منين انك من بره الكلية ؟ اكيد عشان مش شبههم ... لو بتروح كتير ممكن تكتسب الشبه ده و لو نفسك اوى ابقى حل شوية شيتات و خش ورشة مرة



3- لما تيجى تخش المحاضرة تلاقى واحد مطلع من شنطته كتبالمنهج كلها , و راصصها ع البنش كأنوا بيبيع جرانين و تيجى تسألوا يقولك : محجوز ياباشمهندس


و لو ركزت اكتر ممكن تلاقى مجلات , وجرايد , اخبار ... اهرام ... يعنى مش ده المهم , دة اللى لاقاه الراجل فى البيت هيعمل ايه يعنى ؟




4 – لما تمشى و تلاقى اتنين ولد و بنت , قاعدين لوحدهم , قاعدة شاعرية , فى وسط جنينة خضرا , و العصافير بتزقزق , وتيجى تقرب منهم عشان تسمع بيقولوا ايه ! تلاقى لوحة مرمية وراهم والولد ماسك فى ايده مثلث و بيقول :" و دى ياحبيبتى طريقة استنتاج المسقط الثالث , عشان تعرفى بس
انا بحبك و بعزك قد ايه "




5 – لما تيجى ماشى و تلاقى واحد بيسأل البواب القاعد على باب المبنى , بيقول له " لو سمحت يا بشمهندس هو سكشن 10 فين ؟؟؟" مع انه بواب , وشكله بواب و ماسك مقشة فى ايده بس هو الواد اتعود على الكلمة خلاص




6- لما و انت بتتمشى فى الكلية , وبتبص عالحيطة بالصدفة تلاقى ورقة متعلقة ورا الباب وواقعة , مكتوب فيها ما يفيد بأنك عندك امتحان تانى يوم , ممكن تسقط لو مامتحنتوش , بس هيعملولك ايه يعنى انت الى ماقرأتهاش , هما عملوا اللى عليهم و علقوها




7 – لما تخش الكافيتريا تلاقى ورقة محطوطة مكتوب عليها ممنوع لعب الكوتشينة و جنب الورقة بالظبت اربعة قاعدين بيلعبوا استميشن من أول امبارح , وبيكتبوا على ظهر الورقة دى نتيجة
البولة اللى بيلعبوها ... و لو نظرك يجيب بقى حاول تبص و تطلع حد مش قاعد بيلعب كوتشينة فى بقيت الكافيتريا




8 – لما تلاقى اغلبية طلاب الكلية دة لو مش كلهم بيتخذوا قانون الضرايب الجديد كشعار لهم و هو :
" مصلحتك اولا"