عواطليه

شبابنا الغالي بيقولو
بإن الحاله مِش هِيَه
وإن الأشْيَه مِشْ معدن
عشان قاعدين عواطليه
شبابنا الغالي مِتسَتِف
على القهوه ولا السردين
وعالناصيه اُلُوف واقفين
وفي السايبَر ولا السِيما
دماغهم زايده تلقيمه
لكن فاضيه
شبابنا الغالي مِستني
يجيلو الشغل عند البيت
وبرضو ياريت
تكون شغلانه معقوله
وخد في البال وفي الحُسبان
شبابنا فاهم الفُوله
وعارف التِتْ
مِفَتَحْ ذوق بتاع كُلو
وتيجي بعد ده تقولو
في شغلانة أمين مخزن
لا لأ شكراً
شبابنا عنده عزه نفس
وعمر مـ حد جه زَلُه
وبتقولو
امين مخزن
ولو فرضاً
هييجي الشاب يتنازل
ويتكرم
ويقبل رغم اِنُو اصلاً
عاصِر له ييجي كيلو لمون
ورغم انه مفيش خبره
ورغم شهادة الدَبْلـــــون
ورغم القعده عالقهوه
يقول هبدأ كمان شهرين
مرتب لو يكون 2000
اهو يِمَشي
ومكتب 3x5
وفوقي تكيف
ولاب توب Dell نوعه نضيف
وختامه وقلمين حبر
وكام حاجه تِعِين عالصبر
عشان بَزْهق
ورغم ده كله بنوافق وبِنًفِذ
لكٍن اخينا مِتْنَرفِز
وساب الشغل كده فجأه
بدون إنذار
وعُذر اهو قالو مـِ الاعذار
بان مُديرو مِتًنك
وهوه في حالُه كالعاده
لكن الباشا مِتلكِك
وبعدين ايه بِيِجبِرني
مدام مصروفي كده ماشي
وماما عليا بتطبطب
وبتقولي ولا يهمك
بلاش تحرق لنا في دمك
وتتعصَب
وبكره تلاقي شغلانه
مفتش عام , مدير مكتب

شبابنا الغالي يا اخوانه
مثال واضح على الاهمال
مفيش خبره
مفيش تعليم
معندوش حتى طُولِة بال
عشان يسعى ولا يدور
ولا يفكر يزيد خبره
ويفهم حاجه من بكره
عشان قطر الزمن ماشي
وبيعدي
يا تلحق تبقى بني أدم
يا اما تقول
خلاص هتمشًى انا لوحدي