طقطوووقه في الجون

يا شعب مصر يا أبهة .. يا حتة سكرة ..
يالى تحب المظهرة .. والمشورة .. والسمسرة ..
والضحك ويا الكركرة ..
وتخاف أوى م الشوشرة ..

يالى تحب البهدلة .. والفقر وياه الغلا ..
وتعيش معاه بلا مشكلة .. ولا قلقلة ..
تصبر أوى ع الظلم ويا القهر ..
من غير كلام ولا ململة ..
وتخاف أوى م المسألة ..

يالى تحب البحلقة والزحلقة ..
والسأسأة بالمعلقة ..
والفهلوة والمهيصة ..
على حاجة هايفة مخلصة ..
والمصمصة واللغوصة ..
ولا تعترض ع الخصخصة ..

وتحب تمشى جنب الحيط ..
تقعد فى الغيط ..
تاكل بطاطا ويا سميط ..
وتزغط البطة تزغيط ..
تعملى حويط ..
حريف أوى كده فى التنطيط ..
ورا أى عبيط ..

تدب أجدعها خناقة ..
علشان كورة أو فزورة ..
أو بت حلوة صغيورة ..
وإذا بس عسكرى عسكورة ..
جه واتمنظر ..
تعملى نفسك عصفورة ..

يا شعب مصر يا أبهة .. يا حتة سكرة ..
ممكن تقولى ليه يا ترى ..
كل الشعوب اتقدمت ..
واحنا بنرجع ليه ورا .. !!!